ஹிஸ்டீரியா என்றால் என்ன? (Hysteria)

வளர் இளம்பருவத்தில் “வரும் ஆனா வராது” என்பது போல “இருக்கும் ஆனா இருக்காது” என்று வெளிப்படும் ஒருவகை மனநல பிரச்சினை உண்டு. இதை வாசிக்கும்போதே உங்களுக்கு கொஞ்சம் புதிராக இருப்பது போல இந்த நோயும் ஒரு புதிர் நிறைந்தது தான்.

பத்தொன்பதாம் நூற்றாண்டில் மருத்துவர்களை திணறச்செய்த ஒரு நோய்க்கு “ஹிஸ்டீரியா” (Hysteria) என்று பெயர். இதில் நரம்பு பிரச்சனைக்கான அறிகுறிகள் இருக்கும், ஆனால் நரம்புகளில் எந்தவித சேதமோ, மாற்றமோ இருக்காது. மனரீதியான பிரச்சனைகள் தான் அதற்கு காரணமாக இருந்ததை கண்டுபிடித்து “ஹிப்னோசிஸ்” (Hypnosis) என்ற முறையில் அதற்கு தீர்வுகாணும் முயற்சியில் வெற்றியும் கண்டார் பாரீசில் பிறந்த பிரபல நரம்பியல் நிபுணர் ஜீன் மார்டின் சார்கோட். அவரிடம் சிலகாலம் பயிற்சி மேற்கொண்ட சிக்மண்ட் ஃப்ராய்டு இதை மேலும் ஆழமாக ஆய்வு செய்து உளபகுப்பாய்வு சிகிச்சை (Psychoanalysis) முறையை நடைமுறைக்கு கொண்டுவந்ததால் உளபகுப்பாய்வின் தந்தை என்ற பெயரை பெற்றார். .

ஹிஸ்டீரியா எப்படி உருவாகிறது?

இந்த சிக்மண்ட் ஃப்ராய்டு தான் உடலின் பாகங்கள் போல மனதிற்கும் கட்டமைப்பு உண்டு என்று வெளியிட்டார். அவரின் கூற்றுபடி எல்லா மனிதருக்கும் ஆழ்மனது, சுய உணர்வுடன் கூடிய வெளிமனது என இரண்டு உண்டு. நாம் பிறந்தது முதல் இன்றுவரை நடந்த எல்லா அனுபவங்களும் முழுமையாகவோ அல்லது சிறுபகுதியாகவோ ஆழ்மனதில் கணிணியின் ‘ஹார்டு டிஸ்க்கில்’ பதிவது போல பதிந்து கொண்டேவரும். ஆனால் எது பதிகின்றது என்பது வெளிமனதுக்கு தெரிவதில்லை. பதிந்த விசயங்கள்

அவ்வப்போது வெளிவர முயற்சிக்கும். ஆழ்மனதில் இருக்கும் ஆனால் வெளிமனதுக்கு ஒத்துவராத குழப்பங்கள் சில நேரங்களில் மனநல பிரச்சனையாக வெளிப்படுவதற்கு பதிலாக உடல் நோய் தொந்தரவுகளாக, குறிப்பாக நரம்பு நோய்களாக வெளிப்படும். இதற்கு தான் ஹிஸ்டீரியா என்று பெயர். உடல் நோயாக வெளிப்பட்டாலும் மனநல சிகிச்சையால் மட்டுமே இதை குணப்படுத்த முடியும்.

யாரை பாதிக்கும்?

இந்த மனநோயானது வளர் இளம் பெண்களை தான் மிக அதிக அளவில் பாதிக்கும். சில நேரங்களில் திருமணத்திற்கு பின் கூட பாதிப்பு ஏற்படலாம். ஆண்கள் இதற்கு விதிவிலக்கல்ல. ஆனால் சொற்ப அளவில்தான் பாதிக்கப்படுகின்றனர். சிறுவயதில் பெற்றோரை இழப்பது, சிறுவயதில் பாலியல் ரீதியான பாதிப்புகள், குடும்ப பிரச்சனைகள், பள்ளியில் மற்றும் படிப்பில் ஏற்படும் பிரச்சனைகள், விடலைக்காதல் அனுபவங்கள், மனக்கசப்புகள், பெற்றோரால் வளர்க்கப்படாமல் வேறு குடும்ப உறுப்பினர்களால் வளர்க்கப்படும் குழந்தைகள், போதுமான அன்பு மற்றும் கவனம் கிடைக்காத குழந்தைகள் ஆகியோர் வளர் இளம் பருவத்தில் இந்த நோயினால் மற்றவர்களைக்காட்டிலும் அதிக பாதிப்புக்குள்ளாக வாய்ப்பு உள்ளது. பெற்றோர்களில் ஒருவரிடம் மட்டும் அதிக நெருக்கமாக இருந்து ஒருவரை புறக்கணிப்பதும் இதற்கு காரணமாக அமையலாம். குறிப்பாக அப்பாவினால் அதிக செல்லம் கொடுத்து வளர்க்கப்படும் பெண்பிள்ளைகள் அதிக பாதிப்புக்குள்ளாக வாய்ப்பு உள்ளது. சில சமயங்களில் மன நோய்களில் ஒன்றான மன அழுத்தநோய் (depression) கூட இது போல வெளிப்படும்.

கலர்புல் மனமும் குணமும்

சிலர் இது போன்ற ஹிஸ்டீரியாவின் தாக்கத்திற்கு ஆளாகும் அளவுக்கு குணரீதியாகவே வளர்ச்சியில் மாற்றங்கள் காணப்படும். அவர்களின் குணநலமாற்றங்களை வைத்து இந்த ஹிஸ்டிரியானிக் பெர்சனாலிட்டியை (Histrionic personality)  அடையாளம் கண்டுகொள்ளலாம். இவர்கள் எப்போதும் எந்த இடத்திலும் தான் மட்டும்தான் நடுநாயகமாக இருக்கவேண்டும் என்ற எண்ணத்தோடு இருப்பதுடன் மற்றவர்களின் பாராட்டுக்கள், புகழ்ச்சியை பெறுவதற்காக எந்த செயலையும் செய்வார்கள். எளிதில் உணர்ச்சிவசப்படுவது, தன்னை கவர்ச்சியாகவும் அழகாகவும் காண்பித்துக்கொள்வதில் அதிக சிரத்தை எடுப்பது, பேச்சினால் பிறரை எளிதில் வசப்படுத்தும் தன்மை இருந்தாலும் அவர்களின் பேச்சு நாக்கு அளவில்தான் இருக்குமே தவிர மனப்பூர்வமாக இருக்காது. ‘ஏத்திவிட்டு ரணகளமானாலும்’ பிறர் தங்களை கேலி பொருளாக்குவதைக் கூட புரிந்து கொள்ள இயலாது. எடுப்பார் கைப்பிள்ளை போல பிறரிடம் பாராட்டுக்களை பெற பல முயற்சிகள் எடுக்கும் இவர்கள் பிறரின் கவனத்தை பெறவில்லை என்றால் ஆக்ரோஷமாக நடப்பது, தற்கொலை முயற்சியில் ஈடுபடுவது மட்டுமல்லாமல் பலநேரங்களில் இந்த ஹிஸ்டீரியாவில் குறிப்பிடப்பட்டுள்ள நரம்பியல் அறிகுறிகளையும் வெளிப்படுத்துவார்கள்.